Евангелие на празник: Свето евангелие според светиот апостол Јован 15:17-27;16:2
| 17. | Оваа заповед ви ја давам: да се љубите еден со друг. |
| 18. | Ако светот ве мрази, знајте дека Мене светот уште пред вас Ме замрази. |
| 19. | Да бевте од овој свет, тогаш светот ќе го љубеше своето; но бидејќи не сте од светот, туку Јас ве избрав од светот – затоа светот и ве мрази. |
| 20. | Помнете ги зборовите што ви ги реков Јас: ниеден слуга не е поголем од својот господар. Ако Мене Ме гонеа, и вас ќе ве гонат; ако Моите зборови ги запазеа, и вашите ќе ги запазат. |
| 21. | Но, сето ова ќе ви го прават заради Моето име, оти не Го знаат Оној, Кој што Ме пратил. |
| 22. | Да не бев дошол и да не бев им зборувал, грев немаше да имаат. Но сега тие немаат изговор за својот грев. |
| 23. | Кој Ме мрази Мене, Го мрази и Мојот Отец. |
| 24. | Ако не бев направил меѓу нив дела, какви што никој друг не направил, грев немаше да имаат; а сега и видоа, и Ме замразија Мене, и Мојот Отец. |
| 25. | Но нека се изврши словото, напишано во нивниот Закон, дека Ме замразија без вина. |
| 26. | А кога ќе дојде Утешителот, Кого што ќе ви Го испратам Јас од Отецот, Духот на вистината, Кој излегува од Отецот, Он ќе сведочи за Мене; |
| 27. | а и вие ќе сведочите, бидејќи од почетокот сте со Мене. |
| 2. | Ќе ве истеруваат од синагогите. Но ќе настапи и време, кога секој, што ќе ве убие, ќе мисли дека на Бога Му принесува служба. |
Евангелие на денот: Свето евангелие според светиот апостол Лука 8:26-39
| 26. | И пристигна во Гадаринскиот крај, спроти Галилеја. |
| 27. | А кога излезе Он на суво, Го сретна еден човек од градот, кој имаше бесови од многу години, и не облекуваше алишта, и не живееше дома, туку по гробовите. |
| 28. | Кога Го виде Исуса, извика и падна пред Него, и гласно рече: „Што имаш со мене, Ти, Исусе, Сине на Севишниот Бог? Ти се молам, не мачи ме!” |
| 29. | Зашто Исус му беше заповедал на нечистиот дух да излезе од човекот; оти долго време го мачеше, и беше во окови, и со вериги го врзуваа, чувајќи го; но тој ги раскинуваше оковите и бесот го тераше да оди во пусти места. |
| 30. | А Исус го праша, велејќи: „Како ти е името?” Тој одговори: „Легион”, зашто многу бесови беа влегле во него. |
| 31. | И Го молеа Исуса да не им наредува да одат во бездната. |
| 32. | А таму, по ридот, пасеа многу свињи; па Го молеа да им позволи да влезат во нив. И им позволи. |
| 33. | И откако излегоа бесовите од човекот, влегоа во свињите; и се гргнаа свињите низ стрмнината и се издавија во езерото. |
| 34. | Свињарите, кога видоа што се случи, избегаа и раскажаа по градот и околината. |
| 35. | И излегоа да видат што станало; па кога дојдоа кај Исуса, го најдоа човекот, од кого беа излегле нечистите духови, како седи пред нозете Исусови, облечен и со здрав разум; и се уплашија. |
| 36. | А оние, што беа виделе, им кажаа како се исцели бесниот човек. |
| 37. | И сиот народ од Гадаринскиот крај Го молеше да си отиде од нив; зашто се беа уплашиле многу. И Он влезе во коработ и се врати. |
| 38. | Човекот, пак, од кого беа излегле демоните, Го замоли да биде со Него; но Исус го отпушти, велејќи: |
| 39. | Врати се во домот свој и раскажувај што ти направи Бог! Тој си отиде и расправаше по целиот град, што му направи Исус. |
Апостол на празник: Второ послание на светиот апостол Павле до Тимотеј 2:1-10
| 1. | Чедо мое, потсилувај се во благодатта, што ти е дадена од Христа Исуса, |
| 2. | и сe, што си чул од мене пред многу сведоци, предај го на верни луѓе, ки се способни и други да научат. |
| 3. | Па така, поднесувај страдања како добар војник на Исуса Христа. |
| 4. | Оти ниеден војник не се вплетува во светски работи, за да му угоди на својот началник. |
| 5. | А ако, пак, некој војува, сепак венец не добива, бидејќи не се борел според правилата. |
| 6. | Земјоделецот што се труди, прв треба да вкуси од плодот. |
| 7. | Разбери што ти зборувам; а Господ нека ти даде разум во сe! |
| 8. | Помни Го Господа Исуса Христа од родот Давидов, Кој воскресна од мртвите, онака како што ви проповедав, |
| 9. | поради кое страдам, дури до окови, како злочинец. Но словото Божјо не се врзува. |
| 10. | Затоа сe трпам заради избраните, та и тие да добијат спасение во Христа Исуса со вечна слава. |
Апостол на денот: Послание на светиот апостол Павле до Ефесјаните 2:4-10
| 4. | но Бог, богат со милост, поради големата Си љубов, со која нe засака, |
| 5. | иако бевме мртви поради гревовите наши, нe оживе со Христа |
| 6. | и нe воскресна со Него и постави на небесата во Христа Исуса, |
| 7. | за да им го покаже на идните векови преизобилното богатство на Својата благодат во добрина кон нас преку Христа Исуса, |
| 8. | зашто по благодат сте спасени преку верата; и тоа не е од вас – Божји дар е; |
| 9. | не е од дела, да не би некој да се пофали. |
| 10. | Оти ние сме Негова творба, создадени во Христа Исуса за добри дела, што Бог ги предодредил уште од порано да ги вршиме. |
Поука на денот: Свети Игнатиј Брјанчанинов
Ако не умреме за светот, не можеме да стекнеме плач и солзи. Нив ги стекнуваме во онаа мера во која умираме за светот. Трудот при самиот плач и излевањето на солзите се состои во присилувањето на плач, во великодушното поднесување на сушата и бездождието, од кои е оптоварен понекогаш блажениот подвиг, но после кои трпеливиот подвижник секогаш се наградува со обилен излив на солзи. Како што земјата која долго чека да биде оросена, конечно добива изобилство дожд и наеднаш се прекрива со нежно бујно зеленило, така и срцето истоштено од духовна суша, а потоа оживеано од солзи, шири од себе мноштво духовни мисли и чувства, украсени со заедничкиот цвет на смирението. Подвигот на плачот, бидејќи неразделен од подвигот на молитва, ги бара истите оние услови на успех кои се потребни и за молитвата. На молитвата и треба трпелив, постојан престој во неа. Истото тоа му треба и на плачот.
