Ден посветен на св. Јоаким Осоговски Чудотворец (02-09-2010)
Централната прослава на патрон празникот во Осоговскиот манастир започна со вечерната богослужба и пречекот на Неговото високопреосвештенство митрополитот Полошко - кумановски господин Кирил.
Набргу црквите и манастирските дворови станаа претесни за верниците кои како река се слеваа од сите страни. Цела ноќ верниот народ се точеше покрај моштите на чудотворецот, големиот молитвеник и застапник пред Бога, кој ги лекува душите и телата на сите кои со вера и љубов му пристапуваат. Во утринските часови, на 29.08.2010 година, кога манастирските камбани го најавија доаѓањето на митрополитот Кирил, започна светата Литургија. По отслужената Литургија беше осветена вода и пресечени славските колачи, а потоа во манастирските конаци беше приредена братско - сестринска трпеза на љубовта.
