Vesti i nastani
 
 
 
 
 

Претседателот на Република Македонија го посети манастирот Трескавец (23.09.2013 20:10)

Претседателот на Република Македонија, Ѓорге Иванов со сопругата Маја вчера го посети манастирот „Успение на Пресвета Богородица“, Трескавец.

Митрополитот преспанско-пелагониски г. Петар, Епископот Хераклејски г. Климент и игуменот на манастирот о. Калист, го запознаа претседателот Иванов со состојбата во која сега се наоѓа манастирот шест месеци по пожарот во кој изгореа конаците, со историјатот на црквата „Успение на Пресвета Богородица“ која датира од 13 и 14 век.

Со големи впечатоци за значењето на манастирот за нашата историја и она што го оставил низ вековите, претседателот Иванов по неговата прва посета на Трескавец, нагласи дека манастирот е сведоштво за минатите, сегашните и идни генерации.

Ова е сведоштво за многу епохи, многу генерации кои овде наоѓале утеха, во овој амбиент каде што се себеосознавале. Сведоштвата за темелите и за фрескоживописот во манастирот укажуваат дека и во минатото имал слични непогоди. Меѓутоа, луѓето секогаш биле сплотени, солидарни, да се обнови и да се изгради“, изјави Иванов.

„Одговорност на оваа генерација, кои сме сега свидетели на ова“, потенцира тој, „е повторно да ја покажеме нашата солидарност за идните поколенија да се сеќаваат на нашата хуманост, помош и на нашата верба во Бога.“

Според
Владиката Петар, за обновата на Трескавец многу е битно што државата, конкретно, Министерството за транспорт и врски го изгради патот долг 7,5 километри. Манастирот ќе се обновува во оригиналната верзија.

Манастирот и досега страдал во пожар. Страдал и во 90-тите години од минатиот век. По повеќе од 20 години, сега ќе се трудиме што е можно пооригинално да се реконструираат конаците и што побрзо. Многу е битно што се изгради патот, тоа ќе ја забрза обновата, материјалите побрзо ќе стигнуваат до манастирот, изјави Владиката Петар.

Откако е изграден патот
зголемен е и бројот на посетителите на Трескавец.

„Ќе се трудиме како Општина да направиме сѐ за да му го вратиме сјајот на манастирот“, изјави Никола Димески, претседател на советот на Општина Прилеп.

Извор: МИА