Соопштение (20.03.2020 12:20)
Светиот архиерејски синод (САС) на Македонската Православна Црква - Охридска Архиепископија (МПЦ-ОА), будно следејќи ја новонастанатата ситуација, со зголемувањето на бројот на случаи заразени со коронавирусот COVID-19, повторно упатува дополнителен апел со цел доследно да се почитуваат мерките преземени од нашата Влада, особено оние што се однесуваат на јавните собири, повиците за самоизолација, како и сите други активни мерки од Министерството за здравство и од Центрите за јавно здравје во подрачните единици на нашата земја. Рестриктивните мерки во однос на богослужбениот циклус треба да бидат усогласени во духот на овие владини вонредни мерки, а секој епархиски архијереј да ги усклади соодветно на реалната ситуација во неговата епархија, во духот на словесноста, просветлението, трезвеноумието и сопствената одговорност.
Ги повикуваме сите верни чеда на МПЦ-ОА, во татковината и во дијаспората, стриктно да ги запазат мерките за ограничување на заразата, наложени од државните власти. Сега е време, не за паника, туку за одговорност и кон себеси и кон ближните, устројувајќи го своето семејство во домашна црква.
Во овие великопосни денови, во молитвите особено сме со заболените во инфективните одделенија, со здравствените работници, болничкиот персонал и со сите оние кои саможртвено се борат за надвладување на пандемијата.
Да бидеме внимателни и одговорни! Божјиот благослов да биде со сите нас.
Канцеларијата на Светиот архиерејски синод на
Македонската Православна Црква - Охридска Архиепископија
