Сочувство по повод упокојувањето на Митрополитот Црногорско-приморски г. Амфилохиј (31.10.2020 11:36)
Ваша Светост,
Нѐ натажи жалната вест за упокојувањето на Високопреосветениот Архиепископ Цетињски и Митрополит Црногорско-приморски, Амфилохиј.
Дозволете ми во Наше име, во името на Светиот архијерејски синод на Македонската православна црква - Охридска архиепископија (САС на МПЦ-ОА), на свештенството, монаштвото и на сите верни чеда, да изразам искрено сочувство и братско сострадание во болката на сестринската Српска православна црква (СПЦ), на Црногорско-приморската митрополија и на сите коишто го почитуваа Митрополитот Амфилохиј. Неговата богољубива личност и дело одбележа една светла страна во поновата историја на Српската Црква. Овој јерарх Христов беше сведоштво за изобилното излевање на даровите на благодатта на Светиот Дух и ќе биде запаметен не само како пастир добар, туку и како врвен професор и педагог, за што и самите посведочуваме како негов студент, но и посветен богослужител, просветен теолог, даровит беседник, грижлив отец на својот народ, монахољубив епископ...
Господ Исус Христос, Кој е воскресение и живот, нека ја упокои душата на новопретставениот Митрополит Амфилохиј во населбите на праведните, меѓу хоровите на светителите, а на сите коишто тагуваат за него, нека им се дарува оправдана утеха и сигурна надеж во воскресението.
Бог да го прости и нека му дарува Царство Небесно!
АРХИЕПИСКОП ОХРИДСКИ И MАКЕДОНСКИ
г.г. СТЕФАН
До
Неговата Светост,
Архиепископот Пеќски,
Митрополит Белградско-карчовачки и
Патријарх Српски
г. г. Иринеј
